Naghatag sang panugyan ang Panay Electric Company (PECO) sa mga pumuluyo sang Syudad sang Iloilo agud malikawan ang sunog.
Ini ang kasunod sang natabo nga sunog sa Tanza Timawa Zone I kag Zone II, Iloilo City Proper sa diin ginatudlo nga rason sang sunog amo ang loose connection nga nag resulta sa short circuit.
Sa interview sang Bombo Radyo kay Mikel Afzelius, Corporate Communications and External Affairs officer sang PECO, iya ginpahayag nga madugay na nila nga ginapahanumdom sa mga pumuluyo nga indi maggamit sang mga indi standard ng mga kable.
Nagakadapat man suno kay Afzelius nga likawan ang paggamit sang telephone wire bilang alternatibo nga electrical wire.
Dugang pa sang natungdan, nagapakighinun-anon man ini sa mga Punong Barangay sa Syudad agud matudluan ang ila mga pumuluyo nga maghalong sa sunog kag indi magpangawat sang kuryente.
