ILOILO CITY – Nakabayad na ang Panay Electric Company (PECO) sang ila tanan nga tax liability sa Iloilo City Government.
Ini ang ginkumpirma ni Atty. Estrella Elamparo, legal counsel sang PECO, subong nga adlaw, Disyembre 6.
Sa interview sang Bombo Radyo kay Elamparo, iya ginpahayag nga nagasunod ang PECO sang obligasyon sini sa layi, lakip na ang obligasyon sa buwis kag ang ‘assessment’ nga contested sang una agud nga ‘matapos na ang istorya.’
Indi pa matumod ni Elamparo kon pila ang ginbayad nga tax liability, apang suno sa iya, base sa iya impormasyon, nabaton na ini sang Iloilo City Government.
Dugang pa ni Elamparo, kun basehan ang kasugtanan sang PECO kag Iloilo City Government, indi na madayon ang kuntani patigayunon nga auction sa Disyembre 12, sa diin ibaligya kuntani ang tanan nga assets sang PECO.
Nahibaluan nga base sa una nga interview sang Bombo Radyo kahapon sang udto, Disyembre 5, kay Atty Eloisa Sy, legal counsel sang PECO, ginpahayag nga may ginpatigayon nga closed door meeting kaupod sanday Iloilo City Mayor Jerry Treñas kag si Marcelo Cacho, Administrative Manager sang nasambit nga kompaniya.
Suno kay Atty. Sy, may yara na sang kasugtanan sa tunga sang syudad kag PECO apang indi pa sila makabayad bangud nga hulaton pa nila nga maratipikahan kag aprubahan sang Iloilo City Council ang balor sang kwarta nga ibayad.
Nahibaluan man nga sa inisyal nga impormasyon gikan sa Iloilo City Government, may kabilugan nga P134 million ang dapat bayaran sang PECO, sa diin P59 million ang principal payment kag P75 million naman ang second kag third assessment santo sa ila nga properties lakip na ang poste kag linya sang kuryente.
