ILOILO – Wala sang kamatuoran ang pahayag sang MORE Electric and Power Corporation (MORE Power) nga nakuha na nila ang mga asset sang Panay Electric Company (PECO) bilang bag-o nga electric power distributor sa syudad sang Iloilo.
Ini ang pahayag ni Atty. Estrella Elamparo, legal counsel sang PECO.
Sa interview sang Bombo Radyo kay Elamparo, iya ginpahayag nga santu sa ‘addendum to the writ of possession’ nga ginpapanaug sang korte, nagapabilin nga yara sa kontrol sang PECO ang power distribution sa bug-os nga syudad sang Iloilo.
Suno pa kay Elamparo, nagalaum sa gihapon ang PECO nga madesisyunan na sang Court of Appeals ang ila petition nga nagapangayo sang temporary restraining order agud mapunggan ang dalayon nga writ of possession.
Sa Lunes, natalana nga mag-file sang duha pa ka motion ang nasambit nga talatapan.
Ang una amo ang Motion to Inhibit the Judge nga amo si Iloilo City Regional Trial Court (RTC) Branch 23 Judge Emerald Requina-Contreras.
Ang ikaduha amo ang Motion to Suspend Proceedings bangud sang nasambit na nga pending nga petition nga nagapangayo sang temporary restraining order sa Court of Appeals.
Nahibaluan nga antes matabo ang expropriation kahapon, Pebrero 28, naka-pasa na ang PECO sang motion of clarification sa RTC.
Ang nasambit nga motion of clarification ang may tinutuyo nga athagon ang ‘coverage’ sang writ of possession kun ano gid ang i-take over sang MORE Power bangud suno kay Elamparo, indi lang power distribution properties ang ginapanag-iyahan sang PECO.
Luyag man sini athagon ang balor sang kwarta nga dapat i-deposit sang MORE Power sa PECO antes maka-take over sang amo nga mga properties.
Sa subong, ginpasalig sang PECO ang mga konsumidor sa syudad sang Iloilo nga ginahimo nila ang ila katungdanan agud mapabilin nga normal ang power distribution apisar sang mataas mga tensiyon sa tunga sang duha ka power companies.
