ILOILO CITY – Nagpasa sang motion of clarification ang Panay Electric Company (PECO) sa lloilo Regional Trial Court (RTC) Branch 23 kasunod sang reiteration sang ‘grant of a writ of possession’ sa MORE Electric and Power Corporation (MORE Power) nga gin-isyu sang korte sang Pebrero 20.
Sa amo mga ruling, nagpapanaug sang order si RTC Branch 23 Judge Emerald Requina-Contreras sa court sheriff nga ibutang na sa possession sang MORE Power ang mga na-identify nga power distribution properties sang PECO.
Lakip sa amo nga mga power distribution properties nga natalana nga i-take over sang MORE Power amo ang lupa, makinaryas, kag building sa Baldoza-La Paz substation; makinaryas sa General Luna substation; lupa kag makinaryas sa Tabuc Suba, Jaro substation; lupa, building, kag makinaryas sa Bolilao, Mandurriao substation; kag, lupa, building, kag makinaryas sa Avanceña Street, Molo substation.
Sa interview sang Bombo Radyo kay Atty. Estrella Elamparo, legal counsel sang PECO, iya ginpahayag nga duha ang luyag athagon sang ila talatapan.
Ang una suno sa natungdan amo ang ‘coverage’ sang writ of possession.
Suno kay Elamparo, mas maayo kun athagon sang korte kun ano gid ang i-take over sang MORE Power bangud suno sa iya, indi lang power distribution properties ang ginapanag-iyahan sang PECO.
Ikaduha, suno kay Elamparo, amo ang balor sang kwarta nga dapat i-deposit sang MORE Power sa PECO antes maka-take over sang amo nga mga properties.
Natalana ang hearing sang amo nga motion of clarification sa Marso 6, Biyernes.
Dugang pa, ginpahayag man ni Elamparo nga kuntani, hulaton anay sang RTC ang desisyon sang Korte Suprema sa issue of constitutionality.
Pahayag ni Elamparo, wala nagapakatig-a ang PECO apang ginalauman nga may yara sang madamo nga kumplikasyon sa tion nga unahon sang RTC ang expropriation bag-o pa man mag-abot ang desiyon sang Korte Suprema may kaangtanan sa issue of constitutionality.
Suno kay Elamparo, sa subong, may mga ‘remedies’ pa nga ginapatigayon ang PECO samtang ginatun-an ang writ of possession kag samtang indi pa pinal ang desisyon sang Korte Suprema.
