Ibutang sa “blacklist” sang Bureau of Immigration si US Marine Lance Cpl. Joseph Scott Pemberton agud nga indi na liwat makabalik pa sa Pilipinas apisar nga ginhatagan ini sang pardon ni Presidente Rodrigo Duterte.
Suno kay Melvin Mabulac, tagpamaba sang Bureau of Immigration, nalimpyuhan lamang ang kaso kriminal kay Pemberton apang magapabilin siya nga “undesirable alien” bangud sa imoralidad.
Gin-base man ang pagpa-blacklist kay Pemberton sa Philippine Immigration Act of 1940.
Sa subong wala pa sang may nabaton nga mandu ang Bureau of Immigration tuhoy sa pagpapauli kay Pemberton apang nagpadala na sila sang sulat sa Bureau of Corrections nga i-turn over sa ila ang soldado nga Amerikano agud ma proseso na ang pagpahalin sa iya sa Pilipinas.
Nahibaluan nga si Pemberton ang ika-apat nga dumuluong nga ginhatagan sang pardon ni Presidente Duterte umpisa nga nagpungko ini sa pwesto.
Apang gin-athag ni Department of Justice Secretary Menardo Guevarra nga ang apat ka mga dumuluong ang kabahin sa kabug-usan nga 139 nga mga preso nga ginhatagan sang pardon sang Presidente.
