Mangin carousel type ang performance sang mga kabanwahanan sa Kasadyahan sa Kabanwahanan sa Dinagyang Festival 2025.
Sa interview sang Bombo Radyo kay Alfonso Baldonado, Program Director sang Kasadyahan sa Kabanwahanan, iya ginpahayag nga kapareho sa gihapon ang dalagan sang kompetisyon sa nagligad nga tuig kon sa diin, magadungan sila perform sa pagbukas sang kompetisyon sa Freedom Grandstand.
Suno kay Baldonado, magasugod sa nasambit nga judging area ang una nga tatlo ka mga tribu nga amo ang tribe number 1 nga Banaag Festival sang Anilao, tribe number 2 nga Kaing Festial sang Leon, kag tribe number 3 nga Tawili Festival sang San Rafael .
Maga-perform naman sa judging area number 2 sa Iloilo Provincial Capitol ang Haw-as Festival sang Dumangas kag Tultugan Festival sang Maasin.
Samtang magapasundayag naman sa judging area number 3 ang Cry of Jelicuon Festival sang New Lucena kag Tangyan Festival sang Igbaras.
Sa judging area number 4, magapaindis-indis ang Hirinugyaw-Suguidanonay Festival sang Calinog kag ang Tinuom Festival sang Cabatuan.
