ILOILO CITY-Ginabantayan na sang bilog nga kalibutan si United States President Joe Biden kun mapakita pa sini nga may ikasarang pa siya nga mangin presidente sang Estados Unidos sang Amerika kag itiglawas ang pinakagamhanan nga pungsod sang dugang nga apat ka tuig.
Ini kadungan sang patigayunon nga North Atlantic Treaty Organization summit sa Washington DC kun sa diin magatililipon ang mga lideres sang mga member countries agud ipakita ang ila paghugpong sa tunga sang pila ka pinakaseryoso nga pamahog sa alyansa sa sulod sang 75 ka tuig sini nga maragtas.
Madamo ang nagakangawa para kay Biden kasunod sang ginpakita sini nga performance sa ila una nga presidential debate ni Donald Trump nga kaangay nga maathag nga patimaan nga nagaluya na ini dala sang ika katigulangon.
Isa sa ginabantayan sa summit amo ang solo news conference ni Biden nga magatakos sang iya mental clarity sa atubang sang mga world leaders kag ang ano man nga ipakita sini ang mahimo magpahangawa pa dugang sa mga Democrats kag mahimo magtulod sa Partido nga mangita sang iban nga standard bearer para sa presidential election.
