Padayon ang imbestigasyon sang Dingle Municipal Police Station sa natabo nga pagpangawat sa donation box sang Parish of St. John the Baptist sa Dingle, Iloilo.
Sa interview sang Bombo Radyo kay Police Captain Alwin Salmon, hepe sang Dingle Municipal Police Station, iya ginpahayag nga nagpalab-ot na sila sang koordinasyon sa amo nga simbahan agud gilayon ma-report kon hinali nga magbalik ang kawatan.
Suno kay Salmon, wala nagpa-blotter ang simbahan apang magahimo sila sang tikang agud matumod ang identity sang indibidwal.
Gin-athag man sini nga wala natigayon makakuha sang kwarta ang persona bangud sa nabudlayan ini.
Gintuad naman sang pamunuan sang simbahan nga may deperensya sa panghuna-huna ang indibidwal nga nagtuyo mangawat sa donation box.
