ILOILO CITY – Ginalauman na nga maga-abot sa syudad sang Iloilo sa masunod nga inadlaw ang ginbakal sang Iloilo City Government nga Personal Protective Equipment kag COVID-19 test kits.
Sa interview sang Bombo Radyo kay Iloilo City Mayor Jerry Treñas, iya ginpahayag nga posible nga buwas nga Marso 27 ukon sa Marso 28 maga-abot ang Personal Protetctive Equipment kag COVID-19 test kits nga ginbakal gikan sa South Korea.
Magluwas diri, ginpahayag man ni Treñas nga padayon ang pagpanghatag sang food assistance kag ang community kitchen sa syudad sang Iloilo.
Suno kay Treñas, ang cash for work ang igapanghatag umpisa sa masunod nga semana kun sa diin mangin benepisyaryo amo ang mga nadulaan sang trabaho bangud sa Coronavirus Disease 2019 (COVID-19) threat.
Kadungan sini, nagpangabay man ang alkalde sa tanan nga sundon ang physical distancing kag ang curfew bangud nga kutub lamang sa Abril 14 ang Enhanced Community Quarantine.
Isa man sa pamaagi sang Iloilo City Government agud nga matapna ang COVID-19 amo ang padayon nga pagdisinfect sa palibot sang syudad gamit ang tubig nga ginbutangan sang chlorine.
Gin-athag man sang natungdan nga fake news ang impormasyon nga siraduhon ang mga grocery store umpisa Abril 1 tubtub Abril 14.
