ILOILO CITY– Ginaprotektahan sang mga persons with disabilities ang ila tagsa ka mga kinamatarung.
Sa interview sang Bombo Radyo kay Ms. Blesilda Mabilog, Officer-in charge sang Persons with Disabilities Affairs Office sang syudad, iya ginpahayag nga nagapanawagan sila sa mga persons with disabilities nga magkuha sang ila identification cards sa ila talatapan.
Kun indi naman makakadto ang mga natungdan sa ila talatapan, nagakadapat nga magpadala ang mga ini sang authorization letter sa katapo sang ila pamilya nga ila man ginhingyo nga magkuha sang idntification card.
Samtang may yara naman suno kay Mabilog sang mga nagareklamo nga drivers kag operators sang jeep bangud sa isa man ka person with disabilities nga nagapang-into sa mga drivers.
Pahayag ni Mabilog nga nagareklamo ang mga drivers bangud ginapalapit sang nasambit nga persona ang iya wheelchair sa salakyan kag magpakuno-kuno nga nabungguan agud may makuha nga claims.
Sa tion nga magsakay naman ini sa jeep imbes nga magpabayad nagapangayo pa ini sang kwarta sa mga drivers kag kun indi mahatagan, ginalista sini ang plate number sang jeep kag ginareport sa Land Transportation Office ukon sa Land Transportation Office Franchising and Regulatory Board rason nga ginamultahan ang mga jeep nga iya ginsakyan
Ginpatawag na nila sa ila talatapan ang ginareklamo nga persona apang wala pa ini sa gihapon nakakadto.
Pananglitan nga indi naman magpasugot ang driver nga magpasakay sang isa ka person with disability mahimo ini nga mamultahan sang P50,000.
