ILOILO CITY- Illegal ang operasyon sang ‘Peryahan ng Bayan’ sa Iloilo City.
Sa interview sang Bombo Radyo kay Iloilo City Councilor Rommel Duron, iya ginpahayag nga mismo si Philippine Charity Sweepstakes Office (PCSO) General Manager Royina Garma ang nag-anunsiyo nga wala sang otoridad ang Peryahan ng Bayan nga mag-operate sa syudad.
Suno kay Duron, ang Small Town Lottery (STL) kag Lotto gid lang ang legal nga naga-operate bangud ang mga ini lang ang nahatagan sang permiso sang PCSO.
Pahayag niya,apisar nakakuha sang status quo ante- order sa korte ang Peryahan ng Bayan agud magpadayon sa pag-operate sa iban nga parte sang pungsod, wala nalakip diri ang Iloilo kag ang bilog nga Panay.
Nahibaluan nga nagpadulong si Garma sa Iloilo sang nagligad nga semana kon sa diin ginsapol niya ang Philippine National Police agud istoryahan ang pagtapna sa operasyon sang Peryahan ng Bayan kag illegal nga sugal sa Panay ilabi na sa Iloilo.
