Nagsarurot liwat sa pinakamahuyang nga balor ang piso matapos magsirado ang trading nga P63.52 ang kambyo sa kada US dollar, Oktubre 22.
Ini na ang ika-30 nga record low sang lokal nga currency sa sini nga tuig sa tunga pa sang nagadugang nga kabalaka sa pagsaka sang inflation samtang nagapadayon ang pagtaas sang presyo sang langis sa kalibutan nga tuga sang nagapadayon nga inaway sa Middle East.
Nagluya ang piso sang 15.9 centavos halin sa nagligad nga record low nga P63.361 kada dollar sang Miyerkules.
Nagnubo ini sa P63.545:$1 sa trading session.
Suno sa isa ka lokal nga currency trader, isa sa mga rason sang pagluya sang piso amo ang mataas nga kahangawa sa pagsaka sang presyo sang mga balaklon sa sulod sang pungsod matapos nga ginpasaka sang Bangko Sentral ng Pilipinas (BSP) sa 6% ang 2027 inflation forecast halin sa una nga 5.4%.
Gintudlo naman sang BSP ang pagsaka sang presyo sang langis sa kalibutan bilang isa sa mga rason sang pagbag-o sa ila forecast.
Samtang, nagpabilin sa 6.1% ang inflation forecast sang BSP para sa 2026, nga mas mataas sa target range nga 2% tubtob 4%. Wala man ginbag-o ang 3.3% nga forecast para sa 2028.
Suno kay BSP Governor Eli Remolona Jr., ginakabalak-an sang central bank nga ang padayon nga pagluya sang piso mahimo magresulta sa dugang nga pagsaka sang presyo sang mga balaklon.
Apang, gin-athag ni Remolona nga wala pa nagaabot sa lebel nga ginapatuman sang BSP ang sitwasyon agud magpatunga ini sa foreign exchange market.
Wala niya ginpahayag ang nasambit nga threshold agud indi ini magamit sang mga speculator sa ila pagbaligya kag pagbakal sa merkado.
