Kasunod sang nakit-an nga padayon nga pagluya sang balor sang Philippine Peso kontra sa US dollar, nagpasalig ang Bangko Sentral ng Pilipinas (BSP) nga magapatunga ini “kun kinahanglan”.
Kahapon, Mayo 21, sang nagsirado sa P58.27 ang baylo sang isa ka dolyar.
Ini ang ikatatlo nga sunod-sunod nga trading day nga nagsarurot ang peso kag pinakamalala ini sa sulod sang 18 ka bulan halin sang nalab-ot sini ang level nga P58.275 sang Nobyembre 8, 2022.
Base ini sa data sang Bankers Association of the Philippines.
Una na ginsiling ni BSP Gov. Eli Remolona nga ang pagluya sang peso ang naangot man sa iban nga mga currencies sa region. Ginpahayag man nga nagpadayon sa pagsaka ang dollar samtang nag-signal ang Federal Reserve sang delay sa pag-cut sang interest rates.
“The peso weakened beyond 58 to the US dollar today, in line with other currencies in the region. The dollar continued to strengthen as the Federal Reserve signaled delay in cutting interest rates,” kabahin sang iya statement.
Ginapadayon ang BSP ang pag-monitor sa foreign exchange market.
Nahibaluan nga kun magpadayon sa pagluya ang peso, mas magamahal man ang balayran sa imports kaangay sang krudo kag bugas bangud mas madamo nga pesos ang kinahanglan nga i-convert sa dollars agud baklon ini nga mga kinahanglanon.
