Sa labing-una nga tion sa maragtas sang Pilipinas, nagsarurot ang balor sang Philippine Peso sa P61-level batok sa United States dollar.
Sandig sa data sang Bankers Association of the Philippines (BAP), nagtakop ang trading subong nga Martes, Abril 28, nga P61.30 ang baylo sang piso kontra dolyar.
Sa pagbukas sang trading, P60.8 ang piso batok sa amo nga currency.
Natabo ini masobra isa ka bulan lang matapos nagsarurot kag nakalab-ot ang piso sa 60-per-dollar mark. Sang Marso 31, may yara sang nauna nga record low nga P60.748.
Sa inisyal nga paglantaw, kun may depreciation ang peso, maga-benepisyo diri ang mga pamilya sang overseas Filipino workers (OFWs) kag mga Pinoy nga nagaganar sang US dollars bangud magasaka ang ila mabaton sa remittances, apang sa pihak nga bahin, mas magamahal naman ang imports kaangay sang fuel bangud ginabayaran man ini paagi sa US dollars.
Ginalantaw nga mas magalala man ang inflation nga gina-forecast na nga daan sang Bangko Sentral ng Pilipinas nga maga-average sa 6.3% subong nga tuig.
Magluwas diri, bangud man sang pagluya sang peso, may impact man ini sa utang sang Pilipinas, ilabi na nga one-third sang amo nga utang ang naghalin sa foreign creditors ukon mga manugpautang halin sa luwas sang pungsod.#
