Ginalantaw sang analysts nga mas magaluya pa gid ang Philippine Peso sa nabilin nga mga sinemana sang second quarter sang 2026 antes ini makabangon-bangon sa ulihi nga bahin sang tuig.
Ini ang forecast sang MUFG Bank bangud ginalantaw nga maapektuhan ang peso sang mas mataas nga import costs, second-round effects sa domectis prices, kag mas hugot nga financial conditions.
Sa paglantaw sang MUFG, sa baseline scenario, mahimo maglab-ot sa P62 ang baylo sang US Dollar sa katapusan sang second quarter; maka-recover sa 61.50 sa third quarter; 61 sa fourth quarter; kag 60.50 sa first quarter sang 2027.
Sa adverse scenario, mahimo maghina ang peso tubtob 62.50 sa ikaduha nga quarter kag 63 sa ikatatlo nga quarter.
Sa severe scenario naman, mahimo makaabot ang exchange rate sa 63 sa ikaduha nga quarter kag 64.50 sa ikatatlo nga quarter.
Nahibaluan nga isa ang Pilipinas sa ginalantaw nga mas delikado nga ekonomiya sa rehiyon bangud sang iya pagsalig sa imported nga enerhiya.
Nagakuha ang pungsod sang 95 porsyento sang crude oil imports halin sa Middle East samtang ang kabug-usan nga external energy dependency sini nagaabot sa 78 porsyento.
Una na nga ginsiling sang Bangko Sentral ng Pilipinas nga ang inflation mahimo mag-average sang 6.3 porsyento subong nga tuig kag 4.3 porsyento sa 2027. Bangud sini suno kay BSP Governor Eli Remolona Jr., mahimo paabuton sang market ang sunod-sunod nga gamay nga pagsaka sang interest rates.
