Ginbasura sang Municipal Trial Court in Cities (MTCC) Branch 1 ang petisyon para nga panason ang pangalan sang mga Baronda sa listahan sang mga botante sa Barangay Javellana, Jaro, Iloilo City.
Kalakip diri ang pangalan ni Iloilo City Lone District Rep. Julienne L. Baronda kag sang iya duha ka utod nga sanday Julie Anne Michelle Linaogo Baronda, kag Urminico L. Baronda III.
Sa 16 ka pahina nga desisyon ni Judge Mia Laine Catalan-Dabao nga may petsa nga Septyembre 19, 2026, ginbasura sini ang petition for exclusion nga gin-file ni Shemar Hautea Arañador.
Base sa desisyon, indi mapag-on ang ebidensya sa alegasyo nga nagbiya ang mga tatlo ka mag-utod nga Baronda sa amo nga barangay kag nagsaylo sa San Jose, Jaro.
Sa pihak nga bahin, ginsiling sang korte nga nakapakita sang bastante nga mga dokumento ang mga Baronda nga nagapamatuod nga mga residente kag rehistrado nga botante sila sang Javellana sa sulod na sang pila ka dekada.
