Ginpaathag sang isa ka abogado nga wala sang ‘second placer rule’ nga sundon kun hinali nga ma-disqualify subong si presumptive president Ferdinand ‘Bongbong’ Marcos, Jr.
May kaangtanan ini sa duha ka petition nga ginpasaka sa Korte Suprema nga nagatuyo nga i-disqualify si Marcos kag punggan ang Kongreso nga mag-canvass sang boto sa presidential elections.
Ang ikaduha nga petition nga gin-file ang nagahingyo sa Korte Suprema nga ideklarar si Vice President Leni Robredo — nga amo ang nakakuha sang ikaduha nga pinakamataas nga boto — nga amo ang winner sa presidential elections.
Sa interview sang Bombo Radyo kay Atty. Noel Palomado, isa ka Bombo Abogado, iya ginpahayag nga indi makapungko si Robredo bangud maathag sa resulta sang eleksyon nga masulusobra lang sa 14 million ka boto ang nakuha sini ipaanggid sa 31 million nga nagboto kay Marcos.
Gin-cite ni Palomado ang recent Philippine jurisprudence sa “no second placer” rule ukon indi pwede nga maka-substitute ang second placer sa sin-o man nga first placer.
Magluwas diri, gintumod man ni Palomado kun ano posible kadugay nga pending ang desisyon sa Korte Suprema.
Maga-umpisa na ang Kongreso sa pag-canvass sang boto para sa presidente kag bise-presidente sa Mayo 24 kag lauman nga sunod na nga iproklamar ang magadaog.
Ang Korte Suprema naman ang yara pa subong sa decision-writing recess nga magalawig tubtub sa Hunyo 10.
Ang first full court session ang lauman nga matabo pa sa Hunyo 14, kag posible suno kay Palomado nga matuigan pa antes madagdag sang Korte ang desisyon sa sini nga mga petition.
Kun hinali nga magpa-guwa sang desisyon ang Korte Suprema kag kun isiling nga i-disqualify si Marcos, sundon suno kay Palomado ang rule of succession bangud probisyon ini sa Konstitusyon nga kun mapatay, ma-disqualify, ukon indi capable ang executive nga magpungko, ang next-in-rank amo ang magabulos sa posisyon.
Buot silingon sini, magapungko bilang presidente ang magadaog nga bise-presidente nga amo subong si presumptive vice-president Sara Duterte-Carpio.
