Ginklaro sang oil and gas company sang Malaysia nga wala sila sang ginkasugtan nga magahatag sang suplay sang langis sa Davao de Norte provincial government.
Suno sa Petroliam Nasional Berhad (PETRONAS), wala sila sang ihibalo sa amo nga arrangement kag wala gid sila nagsulod sa amo nga kasugtanan ukon commitment.
Gin-athag nila nga ang atensyon sini subong nakasentro sa pagsiguro nga may tayuyon nga suplay sang langis sa Malaysia.
“PETRONAS wishes to clarify that it is not aware of, nor involved in, any such arrangement, and has not entered into any related agreement or commitment,” suno sa state-owned firm sa media release nga gin-post sa ila nga website, Marso 29.
Ini nga statement ang ginpaguwa kasunod sang pahayag ni Davao del Norte Governor Edwin Jubahib nga nagapakig-istorya na ang probinsya sa representative sang hari sang Malaysia agud makabakal sang ginabanta 44 million liters sang diesel.
Isa ang Pilipinas sa pinakaapektado halin sang nagsugod ang gyera sang Israel, US, kag Iran ilabi na bangud ginbalabagan ang Strait of Hormuz nga amo ang alagyan sang 20% sang langis nga ginagamit sang kalibutan. #
