ILOILO – Gindayaw sang Philippine Army ang pagdeklarar sang Local Government Unit sang Maasin, Iloilo sa New People’s Army nga persona non grata.
Ini ang kasunod sang ginpaguwa nga Municipal Peace and Order Council Resolution No. 01 nga nagadeklarar nga persona non grata ang rebelde nga grupo.
Sa interview sang Bombo Radyo kay Lt. Col. Joel Benedict Batara, commanding officer sang 61st Infantry Batallion sang Philippine Army, iya ginpahayag nga maayo ang lihok nga ginhimu sang Local Government Unit sang Maasin sa pagpamuno ni Mayor Francis Amboy.
Suno kay Batara, ang Maasin ang labing una nga banwa sa Iloilo nga nagdeklarar sa New People’s Army nga persona non grata.
Ginpahayag ni Batara nga nagapakita lamang ini nga nagahugpong ang tanan nga ahensya sang gobyerno agud nga matapna ang insurhensya.
Nagapatimaan lamang ini suno sa natungdan nga wala gina-abi abi ang rebelde nga grupo sa nasambit nga lugar.
