ILOILO CITY – Naghina ang pagsaka sang ekonomiya sang Pilipinas sa una nga tatlo ka bulan subong nga tuig nga amo ang pinakamanubo humalin sang nag-amat-amat na bangon ang pungsod nagikan sa pandemya sa tunga-tunga sang 2021.
Suno sa Philippine Statistics Authority, ang ekonomiya ang nagsaka sa 6.4% nga mas manubo naman sa 8% growth sang una nga quarter sang 2022 kag mas manubo man sa 7.1% growth nga na-record sa ika-apat nga quarter sang 2022.
Ang ekonomiya ang ginatakus pinaagi sa gross domestic product ukon ang total value of goods and services nga na-produce sa isa ka period.
Apisar sini, ginpahayag ni National Economic and Development Authority Secretary Arsenio Balisacan nga kinahanglan nga mangin mahinalungon sa pag-interpret sini bilang “paghina” bangud nga ang economic growth sang nagligad nga tuig ang nagikan sa low base.
Nahibaluan nga ang economic growth projection sang Marcos administration sa 2023 ang ginpanubu-an bangud sa ginalauman nga external headwinds kag paghina sa major advanced economies.
