Ginsuguran na sang Pilipinas kag Japan ang opisyal nga pag-istoryahanay para sa mas madalom nga kooperasyon sa patag sang depensa kag intelligence sharing.
Katuyuan sini nga pabaskugon pa ang koneksyon sa tunga sang duha ka nasyon bangud sa tensyon sa kadagatan nga pilit nga ginaagkon sang China.
Sa ginpatigayon nga meeting sa Malacañang kaupod kay Presidente Ferdinand Marcos, ginkumpirma ni Japanese Prime Minister Shigeru Ishiba nga nakasugtan nila nga umpisahan ang negosasyon para sa ginatawag nga Acquisition and Cross Servicing Agreement ukon ACSA.
Isa ini ka kasugtanan nga magatugot sa bayluhanay sang suplay kag serbisyo sa tunga sang Japan Self-Defense Forces kag Armed Forces of the Philippines.
Magluwas diri, suguran man ang government-to-government talks para sa isa ka Security of Information Agreement, nga magahatag sang ligwa para sa mas hilway nga bayluhanay sang sensitibo nga impormasyon.
Gindayaw naman ni Presidente Ferdinand Marcos Jr. ang Japan bilang pinakauna nga pungsod nga naghatag sang Official Security Assistance ukon OSA sa Pilipinas — nga nakabulig sa modernisasyon sang mga ahensya nga responsable sa pungsodnon nga seguridad.
Kabahin ini sang mas ginpabakod nga strategic partnership sang Pilipinas kag Japan, nga tuyo nga pat-uron kag ipabilin ang kalinong kag katawhay sa Indo-Pacific region bangud man sa nagainit nga isyu sa West Philippine Sea.
