Nakapauli na sa Pilipinas ang men’s national curling team matapos ang maragtason nga kadalag-an sang nakuha sini ang gold medal sa 9th Asian Winter Games sa Harbin, China.
Ini nga team nga pang-51 sa world ranking ang ginabug-usan nanday Marc Pfister, Christian Haller, Enrico Pfister, Alan Frei, kag Benjo Delarmente.
Nahimo nila ang upset batok sa tournament favorite kag world. no 7 nga Republic of Korea sa score nga 5-3 sa gold medal game sang men’s tournament sa Harbin Pingfang Curling Arena sang Biyernes.
Ini ang naghatag sa Pilipinas sang labing-una nga bulawan nga medalya sa Asian Winter Games. Ang Pilipinas man ang labing-una nga Southeast Asian country nga nakakuha sang pinakamataas nga podium finish sa amo nga quadrennial multi-sports showcase.
Kasunod sang kadalag-an, magabaton ang team sang P2-million nga cash incentives halin sa gobyerno sa idalom sang expanded National Athletes and Coaches Incentives Act.
May tyansa man nga makakuha ini sang mas daku nga insentibo bangud sila ang nagbutang sang gamay kag tropical country sa mapa sang event kun sa diin tradisyonal nga gina-dominar sang mga nasyon nga may winter seasons.
Natalana nga magpasakop ang national team sa Pan-Continental Curling Championships Division A sa Nobyembre para nga maka-qualify sa World Cup sa labing-una nga tion.#
