Kumpyansa si Philippine Ambassador to the US Jose Manuel Romualdez nga magapabilin nga mabakod ang relasyon sang Pilipinas kag Estados Unidos bisan sin-o pa nga presidential candidate ang magadaog sa US elections sa Nobyembre 5.
Kalmado ang Pilipinas suno kay Romualdez bangud wala man sang ginapanan-aw nga daku nga pagbag-o sa polisa sa tunga sang duha ka mga pungsod kun alyansa ang pagahambalan.
Ginpahayag sini nga naka-istorya siya sa kampo nanday Republican presidential candidate kag former US President Donald Trump kag Democratic presidential candidate kag US Vice President Kamala Harris kag ginpasalig sa iya nga wala sang mangin pagbag-o sa foreign policy.
Importante suno kay Romualdez nga mapabilin ang mabaskog nga economic ties sa Estados Unidos bangud mas nagasaka pa subong ang foreign investments sa Pilipinas.
Wala naman sang dapat kahangaw-an suno sa iya kun ano ang mangin panindugan sang US president sa isyu sa West Philippine Sea bangud ang gina-istorya man sangf Pilipinas amo ang military ukon Pentagon kag nakahibalo sila nga para ini sa mutual interest ukon interes sang duha ka nasyon.
Nahibaluan nga sige pa subong ang pagpangampanya nanday Harris kag Trump ilabi na sa key battleground states apisar nga sa Nobyembre 5 na ang eleksyon. Ini nga states amo ang Nevada, Michigan, Pennsylvania, Wisconsin, Arizona, Georgia, kag North Carolina.
Ulihi nagkadto si Harris sa Atlanta, Georgia kag nagtambong sa event sa Charlotte, North Carolina samtang nagkampanya naman si Trump sa Gastonia, North Carolina kag sunod nga nagbyahe sa Salem, Virginia antes nagbalik sa Greensboro, North Carolina.
Antes pa man ang Nobyembre 5, nagsaka na sa 75.09-million Americans ang nakaboto sang temprano base sa data nga ginpaguwa sang Election Lab tracker sang University of Florida.
