ILOILO CITY — Naglab-ot sa ginabanta nga P50,000 ang benta nga nakawat sa JASAC Drug Store sa Barangay Filomena, Arevalo, Iloilo City matapos nga ginsulod ini sang isa ka kawatan.
Sa interview sang Bombo Radyo kay Fil-am Panique, pharamacist sang nasambit nga drug store, iya ginpahayag nga lunsay kwarta ang ginkuha sang suspect kag wala may ginkuha nga kagamitan kag bulong.
Suno kay Panique, madasig nga nakuha sang suspek ang benta sa drawer sang counter bangud wala ini sang password.
Ginpahayag man sini nga duha ka pesos lamang ang ginbilin sang suspek sa diin wala nakaluwas pati ang mga sentimos nga kwarta.
Nahibaluan nga natigayon nga makasulod ang suspek sa establisyemento matapos nga gin-guba sini ang grills sang banyo sang botika.
Una na nga may nagtuyo nga mangawat sa amo nga botika, apang subong lang nga natigayon nga makasulod ang kawatan.
