ILOILO CITY- Wala sang epekto sa dalagan sang imbestigasyon sang Senado may kaangtanan sa ginaalegar overpriced COVID-19 supplies ang pagdangop sa kamara para sa protective custody sang whistleblower nga si Krizle Mago, executive sang Pharmally Pharmaceutical Corporation.
Si Mago nga nagbulgar sa pag-ilis sang Pharmally sang production date sang mga face shield nga ila ginbaligya sa gobyerno ang na-missing sang pila ka adlaw apang natukiban nga yara ini sa kustodiya sang kamara.
Sa interview sang Bombo Radyo kay Senate Minority Leader Franklin Drilon, iya ginpahayag nga mapag-on na ang ginpangbuy-an nga mga statements ni Mago ilabi pa nga nag-testify ini under oath.
Suno kay Drilon, sa tion naman nga magbawi sang statement si Mago, dako ang mangin salabton niya sa layi kag mahimo mangatubang sang kaso nga perjury.
Natingala kag naham- ot naman ang senador kun ngaa sa kamara nagpalapit si Mago kag indi sa National Bureau of Investigation (NBI) ukon Philippine National Police (PNP) kun ang luyag man lang sini amo ang iya seguridad.
Dugang pa sang opisyal, makakilibot man mangin ang tikang sang kamara nga magpatigayon sang kaugalingon nga imbestigasyon apisar may yara man sang senate hearing.
