Ginkumpirma sang Office of the Sergeant-At-Arms (OSAA) sang Philippine Senate nga wala sa gihapon sang ihibalo ang Pharmally Pharmaceutical Corporation executives nga sanday Linconn Ong kag Mohit Dargani may kaangtanan sa lokasyon sang mga box nga naga-unod sang mga dokumento angot sa financial statements sang korporasyon.
Ini ang kasunod sang mando sang Senado nga sayluhon sanday Ong kag Dargani sa Pasay City Jail.
Suno kay Senate Sergeant-At-Arms retired Major General Rene Samonte, gin-hold anay ang pagsaylo sa duha ka Pharmally executives sa Pasay City Jail matapos nagpaggwa si Dargani sang impormasyon may kaangtanan sa posible lokasyon sang financial documents.
“Hindi pa sa ngayon, wala pa kasing ibinibigay si Mohit na exact location. Pinapa seguro ko na alam niya pupuntahan at kung ano ang uunahin kasi tatlo sinasabi, office, residence at warehouse,” pahayag ni Samonte sa isa ka mensahe.
Matandaan nga kahapon, Nobyembre 26, nagmando ang Senate blue ribbon committee nga sayluhon si Ong — ang director sang Pharmally Pharmaceutical Corporation kag ang corporate secretary kag treasurer nga si Dargani sa Pasay City Jail.
Matapos naaprubahan ang motion, nag-apelar si Dargani kay Senate blue ribbon chairman Richard Gordon nga kun mahimo, siya nalang mismo ang magpangita sang mga box nga may mga dokumento.
Naghingyo man si Dargani nga makigsapol kay Ong sa pribado nga setting.
Gin-grant ni Gordon ang request ni Dargani nga makig-istorya kag Ong, apang nagwarning ang senate blue ribbon chairman nga kun indi sini madala ang mga box sa senado, dagdagan ang mga ini sang standing order agud masaylo sa Pasay City Jail.
