“Wala ka gid may makita nga kapawa sa palibot mo. It’s gloomy. It looks like winter nga daw may maabot nga snow pero wala gid. Grey ang palibot. Yesterday, daw amo to ang highlight gid sang forest fires. I opened the windows, daw maulan pero wala gid ulan. Mainit actually.”
Ini ang paglaragway ni Bombo International Correspondent Dr. John Tacapan sa wildfire sa California, Washington state kag Oregon.
Suno kay Tacapan nga subong yara sa Long Beach, isa ka coastal city sa Southern California, nagaitom na ang ila palibot amo nga limitado ang hulag sang tanan nga mga residente.
Kun wala sang importante nga kinahanglanon sa gwa, tanan nga tawo ang nagapabilin lang sa ila nga mga balay.
Wala sang forced evacuation sa ila nga lugar suno sa natungdan apang mismo ang mga lokal nga ahensya na ang nagadesisyon kun apektado na sang sunog ang ila nga mga establisemento kag trabaho.
May mga ginhanda man ang gobyerno nga community shelters kag mga eskwelahan nga mahimo masayluhan sang apektado nga mga residente.
“Very phenomenal and breathtaking but there is another side of the picture,” pahayag ni Tacapan may kaangtanan sa apocalyptic imagery sa ila lugar. “Ang hangin indi na safe sa lawas sang tawo.”
Base sa report sang National Interagency Fire Center, ginhingyo na ang madamo nga bombero sa Estados Unidos agud magbulig sa pagpalong sang kalayo.
Sa latest nga record sang ahensya, masobra 100 ka wildfire sa 12 ka Western States ang nagsunog sa masobra 4.3 million acres ukon masobra 7,000 square miles.
Suno sa Cal Fire, ang August Complex fire sa Northern California amo ang pinakadaku nga sunog sa maragtas sang amo nga estado nga amo ang naglamon sang 471,185 acres kag 24% contained pa lamang umpisa sang Agusto 17.
Sa subong, suno sa California Department of Fires and Forestry Protection, masobra na sa 14,000 ka bombero ang nag-augment agud mapalong ang 28 ka wildfire sa Golden State.
Ginahibalo pa sang mga otoridad ang kabug-usan nga halit dala sang sunog.
Nagsaka naman sa walo ka tawo ang napatay. #
(With reports from CNN World)
