ILOILO CITY–Indi na dapat nga makibot ang publiko sa pagpang recruit sang New People’s Army (NPA) sa mga eskwelahan sa bug-os nga Pilipinas para sa ginapahayg Red October Plot.
Sa interview sang Bombo Radyo kay Col. Benedict Arevalo, commander sang 3O1st Infantry Brigade (IB) sang Philippine Army, madamo nga myembro sang NPA nga nagkalamatay nga anay estudyante sang mga unibersidad.
Suno kay Arevalo, ginahaylo ang mga kabataan nga magsulod sa organisasyon sang League of Filipino Students (LFS) agud paupdon sa rally.
Kun may yara sang potensyal ang kabataan, himuon sila nga leader tubtob nga mahagaran sang mga recruiters padulong sa mga kabukiran.
Dugang pa ni Arevalo, indi na bag-o ang pagpangrecruit sa mga estudyante bangud madugay na ini nga buluhaton sang mga NPA.
Sa pihak sini, gin-athag sang opisyal nga indi tanan nga eskwelahan ang gina-atake sang NPA.
Sa subong, may yara sang 18 ka mga eskwelahan nga gina-alegar may recruitment ang Communist Party of the Philippines-New People’s Army (CPP-NPA) sa Metro Manila.
Gin-athag man ni Arevalo nga “cover up” lang sang NPA nga may ginapakigbato sila sa pungsod.
Sa pagkamatuod suno kay Arevalo, ang ubra sang mga rebelde amo ang pagpangilkil lamang kag pagpamahog sa mga tawo nga indi maghatag sa ila sang kwarta.