MIAG-AO, ILOILO – Ginkumpirma sang Philippine Army nga New People’s Army (NPA) ang masobra 10 ka armado nga tawo nga nakit-an sa Brgy. San Jose, Miag-ao, Iloilo sang damlag lang.
Sa interview sang Bombo Radyo kay Lt. Col. Joel Benedict Batara, Commanding Officer sang 61st Infantry Battalion sang Philippine Army, iya ginpahayag nga nagpatigayon ang NPA sang checkpoint sa lugar kag nagpangkakas sang campaign posters ni Retired General Gerardo Flores nga nagakandidato sa pagkamamalidha sa First District sa probinsya sang Iloilo.
Gilayon naman nga nagpalagyo sa lugar ang mga NPA member sang nahibalu-an nga nagapadulong ang mga suldado kag Citizen Armed Force Geographical Unit (CAFGU) members.
Hugot naman nga ginapakamalaot ni Batara ang ginhimu sang NPA kag ila na nga ginahibalo kun bala may lamud-pamulitika ang insidente.
Kadungan sini, nagpaandam naman ang militar nga mahimo pasakaan sang kaso kriminal ang mga kandidato nga madakpan nga nagapakighimbon sa NPA.
Ginpasangkad sang Philippine Army ang internal security operations sa lugar agud indi na masulit pa ang insidente.
