ILOILO CITY – Magahatag sang libre nga medical kag dental service ang Philippine Army sa patigayunon nga Bombo Medico 2019.
Isa ang 61st Infantry Batallion sang Philippine Army sa mga magakaigbahin sa Bombo Medico 2019 nga patigayunon sa Hulyo 14 sa Iloilo Science and Technology University (ISATU).
Sa interview sang Bombo Radyo kay 1st Lt. Hazel Joy Mabanta Dorutan, Civil Military Operations Officer sang 61st IB sang Philippine Army, iya ginpahayag nga magahatag sila sang libre nga medical kag dental service para sa mga nagakinahanglan.
Magluwas diri,magahatag man ang Philippine Army sang libre nga masahe, haircut ukon paggunting sang buhok kag hampanganan sa mga kabataan.
Suno kay Dorutan, isa ka daku nga dungog para sa Philippine Army nga makahatag sang bulig sa mga nagakinahanglan paagi sa Bombo Medico.
Ginpahayag sang natungdan nga ang kalipay kag pagpasalamat nga ila mabaton gikan sa mga tawo nga mahatagan sang bulig ang wala sang kabaylo.
Yari ang pagpahayag sang commitment sang Philippine Army sa Bombo Medico 2019.
