ILOILO – Padayun ang monitoring sang Philippine Army sa public officials nga nagsuporta sa New People’s Army sa Western Visayas.
Sa interview sang Bombo Radyo kay Captain Cenon Pancito III, tagpamaba sang 3rd Infantry Division sang Philippine Army, iya ginpahayag nga
ginahibalo pa nila kun bala padayun ang pagsuporta sang pito ka public officials sa rebelde nga grupo.
Suno kay Pancito, natumod na kun sanday sin-o nga opisyal ang naangot sa rebelde nga grupo santo man sa recoveries sa tion nga may yara sang
encounter, intelligence report kag mga ginpangtuad sang anay katapo sang rebelde.
Ginpahayag ni Pancito nga sa tion nga may yara sang nagakaigo nga ebidensya, ang Department of Interior and Local Government na ang magahimo sang lihok batok sa nasambit nga public officials.
Samtang sa interview sang Bombo Radyo kay Department of Interior and Local Government Region 6 Director Ariel Iglesia, iya ginpahayag nga
wala pa siya sang may nabatun nga report may kaangtanan sa mga lokal nga opisyal nga nagsuporta sa rebelde nga grupo.
Suno kay Iglesia, mahimo nga may yara sang lain nga pamaagi sang pagpasa sang report sa ila ang otoridad.
Posible man suno sa natungdan nga ginpadala sa central office sang Philippine Army ang report kag sila na lang ang magapasa sang dokumento sa central office sang Department of Interior and Local Government.
