ILOILO CITY–Gin-athag sang legal counsel sang Phil Pharmawealth Inc. nga ginapanag-iyahan ni Iloilo 4th district Cong. Ferjenel Biron nga wala namitlang ang pangalan ni dismissed multi-awarded Chief of Police Charlie Sustento sa reklamo nga ila ginpalab-ot sa National Bureau of Investigation (NBI).
Ini matapos ang pahayag ni Sustento nga may yara siya sang subpeona sa NBI bangud nga siya ang ginahan-an nga amo ang naghimo sang Phil Pharm Facebook account nga ginapahayag nagapalapta sang sala nga impormasyon batok kay Cong. Biron.
Sa interview sang Bombo Radyo kay Atty. Maylene Villanueva, chief legal officer sang Phil Pharmawealth Inc., iya ginpahayag nga wala namitlang ang pangalan nga Charlie Sustento sa complaint-affidavit nga ginpalab-ot sa NBI Central Office may kaangtanan sa nasambit nga Facebook account.
Gin-athag man ni Villanueva nga wala sang labot si Biron sa ila ginpasaka nga reklamo bangud nga ang nagaserbe nga tagreklamo amo ang kompaniya.
Sa pagkamatuod suno kay Villanueva, sa Facebook account pa sang Phil Pharm nila nahibalu-an nga may yara sang reaksyon si Sustento tuhoy sa reklamo nga ila ginpasaka sa NBI.
Ang ila lang nga tuyo suno kay Villanueva amo nga manabat ang sin-o man nga nagapalapta sang sala nga impormasyon batok sa mamalidha kag indi nila luyag nga may maulamid nga inosente.
