Kumpirmado nga pito ang patay matapos nagtibusok ang isa ka medical transport plane sa northeast Philadelphia sa Estados Unidos sang Amerika.
Ini ang latest nga trahedya sa Estados Unidos nga ginakaulamiran sang eroplano matapos ang natabo sa Washington D.C. sang nagligad nga Miyerkules sang gab-i kun sa diin 67 man ang patay sang nagbungguanay man ang passenger plane kag ang helicopter sang US Army.
Sa Philadelphia, lakip sa napatay amo ang anum nga sakay sa eroplano kag ang isa nga yara sa salakyan kag nadalahig lamang sang nag-crash na ang aircraft.
Ginkumpirma man nga lunsay Mexican nationals ang anum sakay sa eroplano nga halin sa Northeast Philadelphia Airport kag pakadto sa Branson, Missouri, United States.
Ang bata nga yara sa eroplano ang bag-o lang naghalin sa Shriners Children’s Philadelphia. Gin-report nga bag-o lang natapos ang treatment para sa iya kag antes nagpauli kaupod sa iya nga iloy, may send-off nga ginpatigayon sa ospital.
Magluwas sa mga napatay, 19 ang pilason.
Base sa flight logs, halos isa ka minuto pa lamang sa kahawaan ang eroplano ang nagtibusok ini, apang indi maathag kun ano ang rason.
