ILOILO CITY – Indi applicable para sa tanan ang ginaduso ni Department of the Interior and Local Government Sec. Eduardo Año nga butangan na lang sang sidecar ang mga motorsiklo may kaangtanan sa ginapatuman nga physical distancing measure.
Sa interview sang Bombo Radyo kay Atty. Joshua Alim, National Legal Officer sang Philbikers Mosrai Original Association Inc., iya ginpahayag nga madamo nga mga rason kun nga-a indi pabor ang ila asosasyon sa ginaduso ni Sec. Año.
Suno kay Alim, indi applicable kag indi practical ang ginaduso ni Sec. Año bangud sa mga masunod nga rason:
Una, indi tanan nga motorsiklo ang mahimo butangan sang sidecar
Ika duha, indi tanan nga motorcycle driver ang makasarang nga pagpahimo sang sidecar kag
Ika tatlo, wala ginapahanugutan nga makabyahe ang mga tricycle sa national road
Ginpahayag ni Alim nga kun tani, pahanugutan na lang ang angkas sa motorsiklo ilabi na kun magpamilya man lang ang magasakay kag ini ang mas safe kun ipaanggid sa pagsakay sa pampubliko nga salakyan.
Ang best remedy suno sa natungdan amo nga amyendaran sang Land Transportation Office ang ginpaguwa nga memorandum circular tuhoy sa pagdumili sang angkas sa motorisklo.
