Nagpahanumdom ang Philippine Health Insurance Corporation (PhilHealth) nga may yara sila sang benepisyo ukon benefit package para sa mga miyembro sini agud mapamag-an ang pinansyal nga kabudlayan sa pagpabulong sang mga masami nga sakit sa panahon sang tag-ulan.
Ginpahayag sang ahensya nga ginatawag ini nga W.I.L.D. diseases nga nagalakip sang Water and food-borne illnesses, Influenza-like illness, Leptospirosis, kag Dengue – nga madamo ang kaso sa panahon sang tag-ulan bangud sang pagbaha kag pagka-expose sa kontaminado nga tubig.
Para sa mga miyembro kag ila pamilya, nagahatag ang PhilHealth sang masunod nga hospital coverage:
Dengue (may ara man ukon wala sang warning signs) – Tubtob PHP19,500
Severe Dengue Hemorrhagic Fever – Tubtob PHP47,000
Leptospirosis (mild tubtob severe) – Tubtob PHP21,450
Hepatitis A – Tubtob PHP11,300
Acute Gastroenteritis – Tubtob PHP11,700
Ginaengganyo man sang PhilHealth ang publiko nga magpakonsulta gilayon sa doktor kon may mga sintomas sila sang hilanat, sakit sang lawas, ukon iban pa nga palatandaan sang ini nga mga balatian agud malikawan ang seryoso nga komplikasyon.
