Nagapakig-angot kag nagpasalig na ang Philippine Health Insurance Corporation (PhilHealth) sa pamunuan sang Private Hospital Association of the Philippines – Western Visayas Chapter angot sa paghitso sang ila minilyon nga unpaid claims.
Nahibaluan nga nagpadala sang letter of appeal ang pito ka mga pribado nga mga ospital sa Iloilo sa nasambit nga ahensya agud makahatag sang ”immediate response” sa masobra P545.94 Million nga utang.
Sa interview sang Bombo Radyo kay Dr. Elmer Pedregosa, hospital administrator sang Iloilo Mission Hospital kag presidente sang Private Hospital Association of the Philippines – Western Visayas Chapter, iya ginpahayag nga positibo man ang nangin response sang PhilHealth kag adlaw-adlaw ang mga ini nagasapol sa mga personnel sang pribado nga mga ospital agud amat-amat nga maplantsa ang tuman ka dako nga utang.
Suno kay Pedregosa, 2019 tubtob 2021 pa lang nga Accounts Receivable ang ginatutukan subong sang PhilHealth.
Pahayag niya nga gin-presenta naman sang ahensya ang common causes ukon mga rason sang delayed nila nga pagbayad.
Dugang pa ni Pedregosa, nakahatag man ang PhilHealth sang pila ka mga rekomendasyon kun paano amat-amat nga mapangbayaran ang ila nga mga utang.
Nagalaom naman ang pribado nga mga ospital nga mangin ”consistent” ang nasambit nga ahensya agud nga indi man mag-igod ang sitwasyon sa mga ospital.
