Gilayon nga nagpaggwa sang opisyal nga pahayag ang Philippine Health Insurance Corporation (PhilHealth) Region VI matapos ginpasakaan sang reklamo sang Iloilo City Government bangud sa wala nabayaran nga utang sa mga ospital sa syudad.
Suno kay PhilHealth Region VI Head Atty. Valerie Anne Hollero, ginakasubo niya ang pagpasaka sa ila sang reklamo ni Iloilo City Mayor Jerry Treñas kag nagalain ang iya nga buot para sa 402 nga empleyado nga nagabaka-baka sa pag-trabaho agud ma-proseso gilayon ang claims sa ila mga partner nga ospital.
Pahayag ni Hollero, sa bilog nga pungsod, sila sa Philhealth Region 6 ang pinakamadasig nga mag-proseso sang claims nga may yara lamang sang 27 days turn around time.
Sila man ang may pinakamadamo nga naproseso nga claims sa diin ang kada empleyado sang opisina ang maka-proseso sang 1,255 ka claims kada bulan.
Apisar sini, ginahingyo niya ang mga empleyado nga magpakabakod bangud bilang public servants, katungdanan nila nga magserbe sa pungsod bisan ano pa ang kabaylo.
Dugang pa ni Hollero, “Padayon lang.”
