NEGROS OCCIDENTAL – Ginapakamalaot sang Philippine Army ang natabo nga engkwentro sa Brgy. Carabalan, Himamaylan City, Negros Occidental kun sa diin 3 ka suldado ang ginbawi-an sang kabuhi.
Sa interview sang Bombo Radyo kay 303rd Infantry Brigade Commander Col. Inocencio Pasaporte, iya ginpahayag nga nagapatigayon sang security patrol ang mga miyembro sang 94th Infantry Battalion para kun tani sa cash grant sa idalom sang Social Amelioration Program sang Department of Social Welfare and Development.
Suno kay Pasaporte, nakabaton sila sang report nga may presensya sang armado nga grupo sa lugar agud magpangilkil sang kwarta kag magpangayo sang bugas.
Malapit na lang kun tani malab-ot sang mga suldado ang rebelde nga grupo sang may naglupok nga Improvised Explosive Device kag hand grenade.
Nagbayluhanay pa sang lupok sa sulod sang 30 minutos nga nagresulta sa kamatayon nanday Corporal Joel Nobleza, 2nd Lt. Ralph Amante Abibico kag Private First Class Carl Venice Bustamante.
Si Nobleza ang ginbawi-an sang kabuhi samtang ginabulong sa hospital samtang ang mga pilason nga mga suldado ang ginkarga sa military choppers padulong sa syudad sang Bacolod.
Nagapati si Pasaporte nga apisar ginpahayag sang New People’s Army nga indi nila miyembro ang isa ka rebelde nga nagsungka sang Abril 16, nahibaluan na sang militar kun sa diin nga bahin sang Central Negros ang ila ginapanaguan.
