ILOILO CITY– Ginhangkat sang Philippine Army nga magpakita sa publiko ang spokesperson sang New Peoples Army Central Panay matapos gintawag sini nga wala sang pulos ang deklarasyon sang banwa sang Maasin kag Janiuay bilang persona non grata ang mga katapo sang NPA.
Sa interview sang Bombo Radyo kay Captain Cenon Pancito III, Spokesperson sang 3rd Infantry Division Philippine Army, iya ginpahayag nga dapat magpakita sa publiko si Jurie Guererro.
Suno kay Pancito insulto sa mga pumuluyo sang duha ka banwa ang ginhimo ni Guererro.
Makabig man ini suno sa iya nga insulto sa mga katapo sang Local Government Unit sang duha ka mga banwa ang pagtawag nga wala sang pulos ang nasambit nga deklarasyon.
Sila sa Philippine Army suno sa natungdan ang nalipay bangud ginpakita sang mga pumuluyo ang ila kagustuhan nga matapna na ang insurgency.
Samtang ginpahayag man niya nga suportado nila ang pagbalik sang anti-subversion law bangud dako ang mabulig sini sa pagtapna sang insurgency apang wala sa ila ang desisyon sa pagbalik sang layi kundi yara ini sa kongreso sang pungsod.
