CAMP PERALTA, JAMINDAN CAPIZ– Ginpasalamatan ang ginkilala sang Philippine Army ang dako nga nabulig ni Police Regional Office (PRO) 6 Regional Director Police Brigadier General John Bulalacao sa pagtapna sang kriminalidad sa Western Visayas.
Sa interview sang Bombo Radyo kay Capt. Cenon Pancito III, spokesperson kag DPAO head sang 3rd Infantry Division sang Philippine Army, iya ginpahayag nga nagpatigayun sila sang Testimonial review and retirement ceremony sa Camp. Gen. Macario Peralta sa Jamindan Capiz bilang pagkilala sa nangin papel sang PNP kag ni Gen. Bulalacao sa pagpasigurado nga Malinong ang bug-os nga Western Visayas .
Sa tion suno kay Pancito ga si Bulalacao ang Director nangin maayo ang koordinasyon sang militar kag Pulis sa bug-os nga rehiyon sa pagtapna sang insurgency kag pagpasigurado sang kalinong.
Hugot naman ang pagpasalamat sang militar kay Bulalacao bangud man sa nabulig sa militar lakip na ang augmentation nagikan sa PNP nga nagtraining pa mismo sa campo sang 3rd infantry division may kaangtanan sa internal security bangud kulang ang pwersa sang militar sa bahin sang Panay.
Magluwas sa insurgency suno kay Pancito, natigayun man nga namentinar ni Bulalacao ang disiplina sa mga pulis lakip na ang mga accomplishments sa iligal nga droga kag sa away kontra kriminalidad.
Nagpalab-ot naman ini sang goodluck message kag pagpasalamat kay Bulalacao nga magabiya na sa serbisyo bilang Police sa Maabot nga Hunyo 27,2019.
Naghingyo man ini sa masunod nga Regional Director sang PRO 6 nga kuntani mas mapabakod, mapasanyog kag magapadayun ang maayo nga kooperasyon sa tunga sang PNP kag sang Philippine Army.
