ILOILO CITY– Ginpanginwala sang Philippine Army nga miyembro sang ila unit ang nagpakilala nga army kag nagkadto kay Katilingaban sang mga Imol sa Syudad (KAISOG) organizer Wilfredo Panuela sa Brgy. Bitoon Jaro Iloilo City.
Sa interview sang Bombo Radyo kay Capt. Cenon Pancito III, Spokesperson kag Division of Public Affairs Office (DPAO) head sang 3rd Infantry Division Philippine Army, iya ginpahayag nga ginsekyar niya sa tanan nila nga units kun bala kabahin sa ila si Rey Gommez apang wala sang may nagagwa nga nasambit nga ngalan.
Suno kay Pancito wala sang opisyal sang Philippine Army nga nagpagwa sang mandato.
Pahayag pa ni Pancito nga wala man sila sang rekord sang complainant nga si Wilfredo Panuela bangud iya man ini nga ginsekyar.
Wala man suno sa natungdan nalakip ang pangalan ni Panuela sa ila gina-uyatan nga mga persons of Interest.
