Iloilo – Ginpasiguro sang Philippine Army nga mas pabaskugon ang joint military kag police operations sa Negros Oriental agud bungkagon indi lang ang mga private armed groups kundi pati man ang rebelde nga mga grupo nga nagatuga sang pamahog sa seguridad sang mga residente kag opisyal sang gobyerno.
Sa interview sang Bombo Radyo kay Brigadier General Marion Sison, commander sang 3rd Infantry Division kag head sang bag-o lang gintukod nga Special Joint Task Force Negros, iya ginpahayag nga nag-umpisa gilayon ang operasyon sang special task force kasunod sang mandu ni President Ferdinand ‘Bongbong’ Marcos, Jr. nga papason ang tanan nga sahi sang lawless violence kag ibalik ang peace and order sa Negros Island.
May yara man sang ginpadala ang Armed Forces of the Philippines nga dugang nga elite unit ukon Light Reaction Company nga may special training sa counterterrorism operations kag involved sa Battle of Marawi.
Ang dugang nga pwersa sang militar ang kasunod sang bag-o nga mga kaso sa Negros Oriental nga nadiskubrehan kag gina-imbestigahan sang gobyerno kasunod sa pagpatay kay Governor Roel Degamo.
Suno kay Sison, hibaluon sang task force kun may yara sang iban nga mga private armed groups nga konektado sa grupo nga nagpatay kay Degamo kag sa walo ka mga sibilyan isa na ka semana ang nagligad.
Ginpahayag dugang sang natungdan ang magapadayon ang special joint task force sang operasyon tubtub nga magbalik sa normal ang sitwasyon kag ma-restore ang sense of security sang mga residente.
