ILOILO CITY– Nagakahangawa ang Philippine Army bangud sa padayon nga recruitment sang New Peoples Army (NPA) sa mga menor de edad sa Western Visayas.
Sa interview sang Bombo Radyo kay 1st Lt. Hazel Joy Mabanta Durotan, Civil Military Operations Officer sang 61st Infantry Batallion sang Philippine Army, iya ginpahayag nga na-alarma sila bangud ang pag-recruit sang NPA ang makapaguba sa buwas damlag sang mga kabataan.
Suno kay Durotan, kalabanan sa mga gina-recruit amo ang mga bata nga naga-edad 10 tubtob 15 anyos.
Santo sa ila nakuha nga mga impormasyon sa encounter site sa President Roxas Capiz, ang mga kabataan nga na-recruit sang NPA ang nag-untat na sa pagtuon bangud sa pagpakigbahin sa rebelde nga grupo.
Ginagamit na man sang rebelde sa pagpang-recruit suno kay Durotan amo ang pagganyat sa mga kabataan sa paggamit sang armas.
Mismo ang mga matag-as nga pinuno sang rebelde nga grupo ang nagahanas sa mga kabataan sa nabukid nga bahin sang 5th district sa probinsya sang Iloilo kag sa 1st District sa probinsya sang Capiz.
Nagalaum naman ang Philippine Army nga magiyahan sang maayo sang mga ginikanan ang ila kabataan nga indi magpadala sa pagpanghaylo sang mga rebelde.
Nahibaluan nga sang damlag lang naka-engkwentro sang 61st IB ang Sangay sa Partido sa Platoon (SPP)-East Komiteng Rehiyon Panay ukon mas kilala nga Eastern Front sa pagpamuno ni alyas Guning.
Nakuha sa encounter site ang cellphones, projectors, sako sang bugas, gasolina kag iban pa nga subersibo nga mga dokumento.
