ILOILO – May yara sang na-monitor nga paghulag sang mga rebelde nga grupo ang Philippine Army sa Panay Island kadungan sang Holy Week.
Sa interview sang Bombo Radyo kay Brigadier General Michael Samson, Commander sang 301st Infantry Brigade, iya ginpahayag nga may nasiplatan sila nga presensya sang Central kag Southern fronts sa San Remegio, Antique; Tapaz, Capiz; kag Libacao, Aklan.
Suno kay Samson, ginalakipan sang masobra 100 ka mga myembro sang rebelde nga grupo ang na-monitor sang Philippine Army.
Ginpahayag dugang sang natungdan nga maayo na lamang nga wala sang may nagluntad nga engkwentro sa tunga sang mga rebelde kag Philippine Army sang Holy Week.
Samtang, nagpanugyan naman si Samson sa mga rebelde nga grupo untaton na ang paghatag sang kahadlok kag pagpangilkil sa mga pumuluyo, kag magbalik na sabak sang gobyerno agud magkabuhi sang normal.
