ILOILO CITY– Nagapabilin nga alerto ang Philippine Army apisar may yara sang ceasefire sa tunga sang rebelde nga grupo kag sa tropa sang gobyerno bangud sa Coronavirus Disease 2019 (COVID-19).
Ini ang kasunod sang pagpalupok sang warning shots sang isa ka duty personnel sang militar sa detachment nga nahamtang sa Brgy. Agcalaga, Calinog, Iloilo.
Sa interview sang Bombo Radyo kay Capt. Cenon Pancito III, tagpamaba sang 3rd Infantry Division sang Philippine Army, iya ginpahayag nga nagpalupok sang warning shot ang on-duty personnel sa detachment bangud may yara siya sang nakita nga nagahulag kag nagtunog ang warning device sa area.
Suno kay Pancito, matapos ang warning shot, wala man sang may nabaton nga return fire ang mga personnel nga yara sa detachment.
Ginpahayag man ni Pancito nga apisar sang deployment sa COVID-19, nagapabilin sila nga alerto.
