ILOILO CITY – Magapatigayon sang imbestigasyon ang Philippine Basketball Association kasunod sang pagpasaka sang kaso sa isa ka Singaporean bangud sa gina-alegar nga pagbayad sa mga players agud nga i-fix ang resulta sang mga hampang.
Suno sa report, nagapangatubang sang kaso sa Singapore si Koa Wei Quan bangud sa gina-alegar nga pag-fix sang resulta sang hampang sa Philippine Basketball Association kag Thailand Basketball League sa tunga-tunga sang Abril kag Hulyo 2018.
Suno kay Commissioner Willie Marcial, imbestigaran ang report ilabi pa nga madamo sang grupo ang naulamid.
Ginapahayag nga nag-offer si Koa sang halos P280,000 kay Ian Sangalang sang Magnolia sang April 6, 2018.
Nakatrabaho niya sanday Sergei Bien Orillo kag Leonidez Zapata Avenido agud nga ma-impluwensyahan ang resulta sang Game 5 sa PBA Philippine Cup Finals batuk sa San Miguel Beer.
Sa amo nga hampang, nagdaog ang Beermen sa score nga 108-99.
Gina-alegar nga gin-tap man ni Koa sanday Orillo kag Zavenido samtang nag-offer ini sang bribe nga P544,000 sa wala ginhingadlan nga mga players sang Blackwater Elite.
Sang April 25, 2018, nagdangat sa P1.5 million ang ginapahayag gin-offer ni Koa sa Blackwater players sa hampang batuk sa Phoenix Fuel Masters.
Magluwas sa Pilipinas, gintinguha-an man ni Koa nga ma-fix ang resulta sang hampang sa Thailand Basketball League sa Filipino player nga si Almond Vosotros kun sa diin, nagdangat sa P67, 000.
Wala nabutang sa court documents kun bala, nabaton sang mga players ang bayad.
