ILOILO CITY – Madulom man ang panulukan apang napuno naman sang duag ang kabuhi sang mga kauturan naton nga bulag.
Sa interview sang Bombo Radyo kay Mary Mae Hones, Presidente sang Philippine Blind Union- Iloilo Chapter, iya ginpahayag nga indi upang ang pagkabulag agud nga mag-untat sa pagpangabuhi.
Sa pagsaysay ni Hones, duha pa lang siya ka tuig sang nalukpan sang palupok ang iya guya rason nga naapektuhan ang iya mata.
Sa iya kahimtangan suno kay Hones, madulom ang iya pananan-awan, indi kasubong sa iban nga bulag nga may yara pa sang may makita bisan gamay lang nga kasanag.
Sang una, nabudlayan siya nga batunon ang iya kahimtangan tubtub nga nangin katapo siya sang Philippine Blind Union kag nahatagan sang kahigayunan nga makatuon sa pagmasahe.
Bisan bulag, ginpahayag sang natungdan nga bugal para sa iya nga makabulig sa iya pamilya sa baylo nga magpasagod lamang.
May kaangtanan diri, magasaulog sang ika-30 nga anibersaryo ang Philippine Blind Union-Iloilo Chapter, ang labing una nga asosasyon sa Iloilo.
Suno kay John Andrie Norico, Secretary sang nasambit nga asosasyon, ang ika-30 nga anibersaryo sang Philippine Blind Union-Iloilo Chapter ang natalana sa Abril 30, 2019 sa diin may mga nanari-sari nga programa nga patigayunon.
Para sa mga magapakigbahin, ang assembly area suno kay Norico ang yara sa Jaro Plaza, alas 7:00 sang aga.
