ILOILO CITY – Magapatigayon sang month-long celebration ang Civil Service Commission kadungan sang ika-119 nga anibersaryo sang Philippine Civil Service.
Sa interview sang Bombo Radyo kay Gilda Salazar, Administrative Officer 5 sang Civil Service Commission 6, iya ginpahayag nga ang month-long celebration ang maga-umpisa sa Setyembre 1 kag may yara sang tema nga “Upholding Integrity and Building High Trust Society”.
Suno kay Salazar, ang kick-off sang nationwide celebration amo ang fun run sa diin diri sa syudad sang Iloilo, ini ang patigayunon sa distrito sang Mandurriao.
Ang matipon nga pondo sa fun run ang pagagamiton sa paghatag sang fianncial assistance sa mga pamilya sang mga napatay nga empleyado sang gobyerno.
May patigayunon man nga government choral competition sa Seytembre 17 sa Cultural Center of the Philippines sa Pasay City samtang ang nationwide job fair ang may yara sang tentative date sa Setyembre 23.
Magluwas diri, may yara man sang patigayunon nga pasidungog sa mga outstanding government workers.
Kadungan sini, ginpsalig ni Salazar nga ang mga wala nakakuha sang Civil Service Exam sang nakaligad nga Agosto 4 bangud sa natabo nga Iloilo Strait tragedy ang mahimo pa nga makakuha liwat sang exam.
Suno kay Salazar, padayon pa subong ang pagproseso sang ahensya tuhoy sa kun san-o ini patigayunon.
Ginpahayag ni Salazar nga ginatipon pa sang ahensya ang mga pangalan sang examinees nga wala nakakuha sang exam bangud nga ginpauntat ang biyahe sang pump boat kasunod sang natabo nga trahedya.
Samtang, ginpasiguro ni Salazar ang maayo nga serbisyo nga igahatag sang Civil Service Commission sa publiko.
Suno kay Salazar, hugot nga ginapatuman sang ahensya sang “Ease of Doing Business and Efficient Government Service Delivery Act of 2018″ ukon ang madasig nga pagproseso sang mga papeles nga kinahanglanon sang kliyente.
Magluwas diri, bukas man ang ahensya sa mga reklamo tuhoy sa mga empleyado nga wala nagatrabaho sang maayo.
Ang mga nasambit nga lihok suno sa natungdan ang pila lamang sa mga pamaagi agud nga magtaas ang pagsalig sang publiko sa gobyerno.
