ILOILO CITY-Ginpaathag sang Philippine Coast Guard (PCG) kun ngaa ang mga Vietnamese ang nagrescue sa 22 ka mga manugpangisda nga Pilipino nga ginbilin sang Chinese fishing vessel.
Sa interview sang Bombo Radyo kay Admiral Elson Hermogino,commandant sang PCG iya ginpahayag nga mas malapit sa gintunaan sang insidente sa Recto Bank ang fishing vessel sang Vietnam rason nga sila ang una nga nakarescue sa mga manugpangisda nga nagpautaw-utaw sa dagat sang halos anom ka oras, matapos naguba ang ila sakayang pandagat.
Samtang ginpahayag man ni Hermogino nga bangud sa natabo nga insidente sa Recto Bank magadugang ang PCG sang pwersa sa West Philippine Sea agud mapasigurado angt seguridad sang mga manugpangisda nga Pilipino.
Iga-extend naman nila sa Recto Bank ang ila pagprotekta sa mga manugpangisda.
Tinguhaon man nila nga makapatigayun sang regular nga pagpatrolya sa nasambit nga lugar.
Ang focus sang ila imbestigasyon suno kay Hermogino, amo ang pagtan-aw sa kun may yara sang kapaltahan ukon kakulangan ang mga Pilipino nga mga manugpangisda kag ang mga nakasaya sa Chinese fishing vessel lakip na ang pagtan-aw sa kun bala may yara sang nahimo nga bayolasyon sa international nga pagsulundan.
