ILOILO CITY – Nagpaandam ang Philippine Dental Association tuhoy sa mataas nga risgo sa pag-angkon sang Coronavirus Disease 2019 (COVID-19) kun magdangop sa illegal practitioners.
Sa pagpaathag ni Dr. Mine Quilino, Presidente sang Philippine Dental Association – Iloilo, nagalaton ang COVID-19 paagi sa body fluids kasubong sang laway rason nga ginpauntat ang dental services sang nakaligad nga mga binulan.
Suno kay Dr. Quilino, sa subong, amat-amat pa lang nga nagabukas ang mga dental clinics kag bilang new normal, ginapatuman ang istrikto nga pagsulundan kasubong sang pagpa-schedule sang appointment sa dentist, pagpatigayon sang screening sa mga pasyente, pagsuksok sang Personal Protective Equipment sang dentist lakip na sang mga staff kag mandatory na sa subong ang paggamit sang autoclave sa pag-disinfect sang dental tools.
Ginpahayag ni Dr. Quilino nga ang dentist gid lamang ang lisensyado kag eksperto sa patag sang oral health apang sa subong nga may yara pa sang community quarantine, mas makapaayo ang home care kasubong sang masami nga pag tooth brush agud nga malikawan ang pag-angkon sang tooth decay.
Apisar nga barato ang serbisyo sang illegal practitioners, ginpahayag sang natungdan nga mahimo pa nga madungan ang problema sa oral health bangud sa kakulang sang nagakaigo nga equipment, tools kag wala sang proper hygiene.
